ಹಫ್ತ್ಯಾಚೊ ಹೊ ಪಯ್ಲೊ ದೀಸ್, ಜೆಜು ಜಿವಂತ್ ಜಾಲ್ಲೊ ದೀಸ್
ಏಕ್ ಕುಟಮ್ ಜಾವ್ನ್ ಆಮಿ ಸಂಭ್ರಮ್ಯಾಂ
ದೈವಿಕ್ ಉತರ್ ಆಯ್ಕೊನ್, ಉಂಡೊ ಮೊಡುನ್ ಸೆವುನ್
ಭಾವ್ ಬಾಂದವ್ಪಣಾನ್ ಜಿಯೆವ್ಯಾಂ.

1. ವಿಚಿತ್ರ್ ಕೃತ್ಯಾಂ ರಚ್ನಾರಾಚಿಂ ಉಗ್ಡಾಸಾಕ್ ಹಾಡುನ್
ಪುತಾ ಮುಕಾಂತ್ರ್ ತಾರಣ್ ದಿಲ್ಲ್ಯಾಕ್ ತಾಕಾ ಧಿನ್ವಾಸ್ಯಾಂ
ಪವಿತ್ರ್ ಅತ್ಮ್ಯಾಚ್ಯಾ ದೆಣ್ಯಾನ್ ಜಿವಿತ್ ಲಾಭಯ್‍ಲ್ಲ್ಯಾಕ್
ತಾಳೆ ಆಮ್ಚೆ ವಯ್ರ್ ಉಬಾರ್ನ್ ತಾಕಾ ನಾಂವಾಡ್ಯಾಂ.

2. ಸಗ್ಳ್ಯಾ ಕಾಳ್ಜಾನ್ ದೇವ್ ಬಾಪಾಚೊ ಆಮಿ ಮೋಗ್ ಕರುಂಕ್
ಕಾಳ್ಜಾಂ ಆಮ್ಚಿಂ ತಾಚ್ಯಾ ಉತ್ರಾಂಕ್ ನವ್ಯಾನ್ ಉಘಡ್ಯಾಂ
ಕಾಲ್ವಾರ್ ದೊಂಗ್ರಾಚೆಂ ಘಡಿತ್ ಜಿಣಿಯೆಂತ್ ಸಂಭ್ರಮುಂಕ್
ಜಿವಂತ್ ಜಾಲ್ಲ್ಯಾ ಕ್ರಿಸ್ತಾ ಥಾವ್ನ್ ಪ್ರೇರಣ್ ಜೊಡುಯಾಂ.

3. ಪವಿತ್ರ್ ಸ್ನಾನಾ ವರ್ವಿಂ ಆಮ್ಕಾಂ ನವೊ ಜಲ್ಮ್ ದಿಲ್ಲ್ಯಾಕ್
ಅಖ್ಖ್ಯಾ ಕ್ರಿಸ್ತೀ ಕುಟ್ಮಾ ಸವೆಂ ಬಾಪಾಕ್ ವಾಖಾಣ್ಯಾಂ
ಸಾಸ್ಣಾಚ್ಯಾ ಸಾಸ್ಣಾಕ್ ಆಮ್ಚೆರ್ ರಾಜ್ವಟ್ ಚಲೊಂವ್ಚ್ಯಾಕ್
ದಿಂಬಿಯೆರ್ ಪಡುನ್ ದೀನ್ಪಣಿಂ ಆರಾಧನ್ ಕರ್ಯಾಂ.