ಸ್ವೀಕಾರ್ ಕರ್ ಸೊಮಿಯಾ ಹೆಂ ಫುಲ್
ಜಿಣಿಯೆಂತ್ ಮ್ಹಜ್ಯಾ ಸುಖಾಚೆಂ
ಧುಳಿಂತ್ ಪಡೊನ್ ವೆಚ್ಯಾ ಪಯ್ಲೆಂ
ಕರ್ ತುಂ ತೆಂ ತುಜ್ಯಾ ಮೊಗಾಚೆಂ

ದೈವಿಕ್ ಫುಲಾಂ ಝೆಲ್ಯಾಂ ತುಜ್ಯಾ
ಸಂಯ್ಭಿಕ್ ಜಿಣ್ಯೆ ವರ್ವಿಂ ಮ್ಹಜ್ಯಾ
ಸ್ಥಾನ್ ಕೆದಿಂಚ್ ಫಾವೊ ನಾ ಮ್ಹಾಕಾ
ಪುಣ್ ತುಂ ಇನ್ಕಾರ್ ಕರ್ನಾಕಾ

ಸ್ವಾದ್ ಆನಿ ರಂಗ್ ಹ್ಯಾ ಫುಲಾಂಚೊ
ಪ್ರಸಾರುಂದಿ ಪ್ರಕಾಸ್ ತುಜೊ
ಕಾಳ್ಜಾಂನಿ ಪೆಟೊಂ ಉಜೊ
ತುಜ್ಯಾ ತ್ಯಾ ದೈವಿಕ್ ಮೊಗಾಚೊ

ಸೊಮ್ಯಾ ತುಜ್ಯಾ ಶೆತಾಂತ್ ವಾವ್ರುಂಕ್
ಜಿಣಿಯೆಂತ್ ಸೆವಾ ತುಜಿ ಕರುಂಕ್
ಅರ್ಪಿತಾಂ ಸರ್ವಸ್ವ್ ತುಕಾ
ದಯೆನ್ ಸ್ವೀಕಾರ್ ಕರ್ ಮ್ಹಾಕಾ