ಸೊಮ್ಯಾ ಜೆಜು ಸ್ವಾಗತ್ ತುಕಾ
ದುರ್ಬಳ್ಯಾ ಕಾಳ್ಜಾಂತ್ ಮ್ಹಜ್ಯಾ
ರಗ್ತಾಮಾಸಾನ್ ತುಜ್ಯಾ ಮ್ಹಾಕಾ
ಧಾದೊಸ್ ಕರ್ ತುಂ ಜೆಜು ಮ್ಹಜ್ಯಾ

1. ಭುಕೆಲ್ಲ್ಯಾ ಲೊಕಾಚಿ ದುರ್ಗತ್ ಪಳೆವ್ನ್
ವಾಡ್ಲೆಂಯ್ ತಾಂಕಾಂ ಉಂಡ್ಯಾ ಮಾಸ್ಳೆನ್
ಉಂಡೊ ತುಂ ಸರ್ಗಿಂ ಥಾವ್ನ್ ದೆಂವ್ಲಲೊ
ಸಾಸ್ಣಿಕ್ ಜಿವಿತ್ ಹಾಡುನ್ ಆಯ್ಲಲೊ
ಯೆ ಜೆಜು, ಕಾಳ್ಜಾಂತ್ ಮ್ಹಜ್ಯಾ
ಭುಕ್ ಥಾಂಬಯ್ ಜೆವ್ಣಾನ್ ತುಜ್ಯಾ

2. ಸಾಮಾರಿಯಾಚೆ ತೆ ಪರ್ಕಿ ಸ್ತ್ರೀಯೆಕ್
ದಾಕಯ್ಲೆಂಯ್ ತೆಂ ಜಿವೆಂ ಉದಕ್
ತುಜೆ ಥಾವ್ನ್ ಉಮಾಳ್ತಾ ಝರ್ ಉದ್ಕಾಚಿ
ತಾನೆಲ್ಲ್ಯಾ ಆಮ್ಚಿ ತಾನ್ ಭಾಗೊಂವ್ಚಿ
ಯೆ ಜೆಜು, ಕಾಳ್ಜಾಂತ್ ಮ್ಹಜ್ಯಾ
ತಾನ್ ಭಾಗಯ್ ಉದ್ಕಾನ್ ತುಜ್ಯಾ

3. ತುಂ ಸೊಮ್ಯಾ ಆಸ್ಲ್ಯಾರ್ ಮ್ಹಜೆ ಬರಾಬರ್
ನಾಕಾ ಮ್ಹಾಕಾ ದುಸ್ರೊ ಆಧಾರ್
ಸಂಸಾರಾಂತ್ ಹ್ಯಾ ಜಿಣಿಯೆ ತಾರುಂ ಮ್ಹಜೆಂ
ಸುರಕ್ಷಿತ್ ನ್ಹಯ್ ತೆಂ ತುಜೆ ವಿಣೆಂ
ಯೆ ಜೆಜು, ಕಾಳ್ಜಾಂತ್ ಮ್ಹಜ್ಯಾ
ಜಾ ಆಧಾರ್ ಜಿಣಿಯೆಂತ್ ಮ್ಹಜ್ಯಾ