ಮಧ್ಯಾನೆಚೆ ಕಾಳ್ಕೆ ರಾತಿರ್, ಗರ್ದನಾಚ್ಯಾ ಲ್ಹಾನ್ಶಾ ಗೊಟ್ಯಾಂತ್
ಸೊಭ್ತಾ ಬಾಳಕ್ ಮಾಣ್ಕಾ ರಿತಿರ್, ಅಂಕ್ವಾರಿ ಮರಿಯೆಚ್ಯಾ ಹಾತಾಂತ್

ಅಬ್ಳೆ ಆಮ್ಚೊ ರಚ್ನಾರ್ ಸೊಮಿ, ಲಾಗಿಂ ಆಜ್ ಸರ್ಯಾಂ’ಮಿ ವೆಗಿಂ

ನಾ ಕಾಂಯ್ ಸಂಭ್ರಮ್, ನಾ ಕಾಂಯ್ ಆವಾಜ್, ಜಲ್ಮತಾನಾ ತೊ ಹೆ ಭುಮಿ
ಸ್ಥಾಪನ್ ಕರ್ಚ್ಯಾಕ್ ಶಾಂತಿಚೆಂ ರಾಜ್, ಮನ್ಶಾಚೆಂ ಸಂಯ್ಭ್ ಘೆತಾ ಸೊಮಿ

ಗೊಟ್ಯಾಚ್ಯಾ ಥಂಡ್ ಹಿಂವಾ ಮಧೆಂ, ಆಂಕುಡ್ನ್ ರಡ್ತಾ ಅಸ್ಕತ್ ಬಾಳ್ಶೆಂ
ರಚ್ನಾರಾಚೆಂ ದೀನ್ಪಣ್ ಕೆದೆಂ, ದುರ್ಬಳ್ಕಾಯ್ ಪಾಂಗ್ರುಚ್ಯಾಂಕ್ ಅಶೆಂ

ಪುತಾಕ್ ಆಪ್ಲ್ಯಾ ದೆಕ್ತಾ ಮರಿ, ಪೊಟ್ಲುನ್ ತಿ ಧರ್ತಾ ವ್ಹಡ್ ಮೊಗಾನ್
ದೇವ್ ತೊ ಖರೊ, ನೀಜ್ ಪೂತ್ ತರಿ, ದೆಕುನ್ ತಾಕಾ ಕರ್ತಾ ನಮಾನ್

ಸರ್ಶಿನ್ ರಾವುನ್ ಜುಜೆ ಭಕ್ತಿನ್, ಧ್ಯಾನಾನ್ ಪಳೆತಾ ದೇವ್‍ಬಾಳ್ಕಾಕ್
ಅನ್ವಾರಾಂ ಥಾವ್ನ್ ಸಗ್ಳೆ ಸಕ್ತಿನ್, ರಾಕ್ತಾ ತೊ ತ್ಯಾ ಕೋಮಲ್ ಸಾಳ್ಕಾಕ್