1. ಭಾಗ್ ಮ್ಹಜೆಂ ಕೆದೆಂ ವರ್ತೆಂ ಸೊಮ್ಯಾ ತುಕಾ ಸೆಂವ್ಚೆಂ
ದುರ್ಬಳ್ ಹ್ಯಾ ಕಾಳ್ಜಾಂತ್ ಮ್ಹಜ್ಯಾ ತುಕಾ ಸ್ವಾಗತ್ ಕರ್ಚೆಂ
ರಾಜ್ಯ್ ತುಜೆಂ ಆನಂದಾಚೆಂ ದೈವಿಕ್ ಸಂತೊಸ್ ದಿಂವ್ಚೆಂ
ಫಾವೊ ಜಾಲಾಂ ಮ್ಹಾಕಾ ತೆಂ ತುಜೆ ಸವೆಂ ರಾಂವ್ಚೆಂ

ಸೊಮ್ಯಾ ತುಜೆರ್ ಪಾತ್ಯೆತಾಂ, ಸದಾಂಚ್ ತುಜೆರ್ ಭರ್ವಸ್ತಾಂ
ಶಾಂತಿನ್ ಪ್ರೀತಿನ್ ಜೀವನ್ ಮ್ಹಜೆಂ ಸದಾಂ ಜಿಯೆತಾಂ

2. ಮಾಸ್ ತುಜೆಂ ಮೊಗಾನ್ ದಿಲ್ಲೆಂ, ಕರ್ತಾ ಪೋಶಣ್ ಆಮ್ಚೆಂ
ಪವಿತ್ ರಗತ್ ತೆಂ ತುಜೆಂ, ಜಾಲಾಂ ಪೀವನ್ ವರ್ತೆಂ
ಜೀವ್ ದಿಂವ್ಚೆಂ ದಾಯ್ಜ್ ತೆಂ ಖರೆಂ, ಆಮ್ಚೆ ಸೊಡ್ವೊಣೆಚೆಂ
ದಿಲಾಂ ಆಮ್ಕಾಂ ಬಾಪಾನ್ ತೆ ಹಾತೆರ್ ಎಕ್ವಟಾಚೆಂ

3. ತುಂಚ್ ಸೊಮ್ಯಾ ರಕ್ಶಕ್ ಆಮ್ಚೊ ಕಶ್ಟಾಂತ್ ಆಧಾರ್ ದಿಂವ್ಚೊ
ದಯಾಳ್ ಗೊವ್ಳಿ ಶೆಳ್ಯಾಂಚೊ ಮೊಗಾನ್ ಸಾಂಬಾಳ್ನ್ ವ್ಹರ್ಚೊ
ದಿವ್ನ್ ಸದಾಂಚ್ ಸಾಂಗಾತ್ ತುಜೊ, ಜಾಲಾಯ್ ತುಂ ಇಶ್ಟ್ ಆಮ್ಚೊ
ಕುರ್ಪೆ ದಾತಾರ್ ಪಾತ್ಕ್ಯಾಂಚೊ ಸಾಗರ್ ಕಾಕುಳ್ತಿಚೊ

4. ಕರ್ ಮ್ಹಜೆಂ ಕಾಳಿಜ್ ಖಾಲ್ತೆಂ, ತುಜ್ಯಾ ಕಾಳ್ಜಾ ಸಾರ್ಕೆಂ
ಕುರ್ಪೆನ್ ದಯೆನ್ ಭರ್ಲಲೆಂ, ಸರ್ವಾಂಕ್ ಮೊಗಾನ್ ಲೆಕ್ಚೆಂ
ಘಾಲ್ ಸೊಮ್ಯಾ ಬೆಸಾಂವ್ ತುಜೆಂ, ಜಿವಿತ್ ಆಮ್ಕಾಂ ದಿಂವ್ಚೆಂ
ದೆಣೆಂ ವರ್ತೆಂ ಸರ್ಗಿಂಚೆಂ, ಜಾಂವ್ದಿ ದಿರ್ವೆಂ ಆಮ್ಚೆಂ