ದೆವಾ ದಯಾಳ್, ಕಾಕುಳ್ತಿಚ್ಯಾ, ಭೊಗಸ್ ಬಾಪಾ ಮೊಗಾಚ್ಯಾ
ಬಾಪುಯ್ ಮ್ಹಣುಂಕ್ ಆಡ್ವರ್ನಾಕಾ, ಭುಗ್ರ್ಯಾಂಕ್ ತುಜ್ಯಾಚ್ ಸೊಡ್ನಾಕಾ

ಏ ಜೆಜು, ಹಾಂವ್ ಕಾಕುಳ್ತ್ ಮಾಗ್ತಾಂ, ದಿತಲೊಯ್ ಮ್ಹಣ್ ಪಾತ್ಯೆತಾಂ
ಸರ್ವ್ ಮ್ಹಜಿಂ ಪಾತ್ಕಾಂ ಕಾಂಠಾಳ್ತಾಂ, ಆಯ್ಚ್ಯಾನ್ ತಿಂ ಸಕ್ಕಡ್ ಸಾಂಡ್ತಾಂ

ಪಾತ್ಕಾಂ ಮ್ಹಜಿ ಮ್ಹಾಕಾ ಫಾವೊ, ಉಜೊ ಕಠಿಣ್ ಸಾಸ್ಣಾಚೊ
ಕಶ್ಟ್ ವಳ್ವಳೆ ಯೆಮ್ಕೊಂಡಾಚೆ, ಸದಾಂಚ್ ಜಳ್ಚ್ಯಾ ಉಜ್ಯಾಚೆ

ಪಾತಕ್ ಆಧಾರ್ನ್ ಹಾಂವೆಂ ಸಾಂಡ್ಲೆಂ, ಸಾಸ್ಣಿಕ್ ಸುಖ್ ದೆವಾಗೆಲೆಂ
ಸಾಂಡ್ಲೊ ಸಾಂಗಾತ್ ಆಂಜ್ ಭಡ್ವ್ಯಾಂಚೊ, ಸಂತೊಸ್ ದೆವಾಕ್ ಪಳೆಂವ್ಚೊ

ಆಬ್ಳೆ ಮ್ಹಜೊ ಸೊಡ್ವೊಣ್ದಾರ್, ಮೊರ್ತಾ ಕಾಲ್ವಾರ್ ಪರ್ವತಾರ್
ಮ್ಹಜೆ ಖಾತಿರ್ ತೊ ವಳ್ವಳ್ಳೊ, ಹಾಂವೆಂ ತಾಕಾ ಖಿಳಾಯ್ಲೊ

ಇತ್ಲೊ ಬರೊ ಜೆಜು ಮ್ಹಜೊ, ಗೊಂಡೊ ಸಂಪೂರ್ಣ್ ಕಾಳ್ಜಾಚೊ
ಕಿತೆಂ ಮ್ಹಣ್ ಹಾಂವ್ ತುಜೆರ್ ಚುಕ್ಲೊಂ, ಕಸೊ ತುಜೆರ್ ಉಪ್ರಾಟ್ಲೊಂ!