ತುಜ್ಯಾ ಹಾತಾಂತ್ ಅತ್ಮೊ ಮ್ಹಜೊ ಒಪ್ಸಿತಾಂ
ತುಜ್ಯಾ ಹಾತಾಂತ್ ಜೀವ್ ಮ್ಹಜೊ ದಿತಾಂ
ಮೊರುಂಕ್ ಜಾಯ್ ಆಮ್ಕಾಂಚ್ ಆಮಿ, ಜಾಂವ್ಚ್ಯಾಕ್ ತುಜೆ ಪರಿಂ
ತುಜ್ಯಾ ಹಾತಾಂತ್ ಮೋಗ್ ಆಮ್ಚೊ ದಿತಾಂವ್

ಮ್ಹಜ್ಯಾ ದೆವಾ, ಮ್ಹಜ್ಯಾ ದೆವಾ, ಕಿತ್ಯಾಕ್ ತುವೆಂ ಸಾಂಡ್ಲಾಯ್ ಮ್ಹಾಕಾ?
ಕಳ್ವಳಾಂಚ್ಯಾ ಧೊಮ್ಸಾತಾಳಾ, ಹುಲ್ಪೊಣೆಚ್ಯಾ ದೊನ್ಪಾರ್ ವೆಳಾ ಮೊಗಾಳ್
ಎಕ್ಲ್ಯಾಚ್ ಪುತಾಕ್ ತುಜ್ಯಾ ವಿಸ್ರುಂಕ್ ತುಜೆಂ ಮನ್ ಪುಟ್ವತಾ?

ದೇವ್ಪಣ್ ಮ್ಹಜೆಂ ಲಿಪೊನ್ ಗೆಲಾಂ, ಮನ್ಶಾ ಸಂಯ್ಭಾಕ್ ವೇಂಗ್
ಮಾರ್ತಾನಾ, ಕೆದ್ನಾ ಖುರ್ಸಾಕ್ ಪೊಟ್ಲುನ್ ಧರ್ಲೆಂ, ಮನ್ಶಾಪಣ್ ಸಯ್ತ್
ತವಳ್ ಲಿಪ್ಲೆಂ, ಆತಾಂ ಖಿಳ್ಯಾರ್ ಉಮ್ಕಳ್ತಾನಾ, ಕಿರ್ಕೊಳ್ ಕಿಡೊ
ಹಾಂವ್ ಜಾಂವ್ಕ್ ಪಾವ್ಲಾಂ

ತುಜಿ ತಾಕಿದ್ ಉತ್ರೊನ್ ಗೆಲ್ಲ್ಯಾ, ಆದಾಂವ್ಕ್ ರಾಕುಂಕ್ ಪುತಾಕ್ ಧಾಡ್ಲೊಯ್,
ಪಾಂಚ್‍ಚ್ ಬರ್ಯಾ ರಚ್ನಾಂ ಪಾಸತ್, ಕುಸ್ಡಿ ಶ್ಹರಾಂ ಉಜ್ಯಾನ್ ಲಾಸುನ್
ಘಾಲ್ಚೊ ನಾಂ ಮ್ಹಣ್ ಸೊಲ್ಲೊ ಕೆಲೊಯ್, ಬಾಳ್ ಮಾತ್ರ್ ತುಕಾ ನಾಕಾ ಜಾಲಾ

ಪಾತ್ಕಿ ಜುದೆವ್ ಕುಳ್‍ಯೆಕ್ ರಾಕ್ ಮ್ಹಣ್, ಮೊಯ್ಜೆನ್
ಮಾಗ್‍ಲ್ಲೆಂಚ್ ತುಂ ಮೊವಾಳ್ಳೊಯ್, ನಿನಿವೆ ಶ್ಹೆರ್ ದಿಂಬಿಯೆರ್
ಪಡ್ಲೆಂ, ದೆಕ್ತಾಂ ತುಜೆಂ ಕಾಳಿಜ್ ರಡ್ಲೆಂ, ಚಾಕ್ರಾಂಕ್ ಅಶೆಂ ರಾಕುಂಕ್
ಗೆಲೊಯ್, ಪುತಾಕ್ ಸಾಂಡುಂಕ್ ಜಾಲೊಯ್ ಧಾರುಣ್

ಕುಡಿಂತ್ ಮ್ಹಜ್ಯಾ ಉಜೊ ಜಳ್ತಾ, ಮೆಣಾ ಪರಿಂ ಕಾಳಿಜ್ ಕಡ್ತಾ ಹಳ್ದಿ
ಪಿಟೊ ಭರ್ಲಾ ದೊಳ್ಯಾಂತ್, ಹಾಡಾಂ ಮ್ಹಜಿಂ ಮೆಜ್ಚಿಂ ಉರ್ಲ್ಯಾಂತ್ ತಾಳೊ
ತಾನೆ ಕೆಂಡಾರ್ ಭಾಜ್ತಾ ಜೀವ್ ಸರ್ವ್ ತುಕಾ, ಬಾಪಾ, ಸೊಧ್ತಾ

ವೆಡ್ಯಾ ಮಧೆಂ ಉಬೊ ಕೆಲಾ, ಪಾತ್ಕಿ ತಕ್ಲಿ ಹಾಲೊವ್ನ್ ಕೆಂಡ್ತಾತ್ “ಆಪ್ಲ್ಯಾ
ಸೊಮ್ಯಾಕ್ ಪಾತ್ಯೆತಾಲೊ, ಕಿತ್ಯಾಕ್ ತರ್ ತ್ಯಾ ಸೊಮ್ಯಾನ್ ಸಾಂಡ್ಲೊ?”
ಬಾಳಕ್ ತುಜ್ಯಾ ಹಿಣ್ಸುನ್ ಹಾಸ್ತಾತ್ ಆಯ್ಕ್, ಆಯ್ಕ್ ಬಾಪಾ, ಸರ್ವ್ ಮೊಗಾಳಾ

ತುಜಿ ಖುಶಿ ಪಾಚಾರ್‍ಲ್ಲ್ಯಾಕ್, ಮನ್ಶಾನ್ ಮ್ಹಾಕಾ ಖುರಿಸ್ ದಿಲೊ ದೇವ್
ಮೋಗ್ ವ್ಹಾಳ್ಚೊ ಅಜಾಪಾಂನಿ, ರೂಪ್ ರೂಪ್ ದೀಸ್‍ರಾತ್ ದೆಕ್ಲಲ್ಯಾಂನಿ
ಏಕ್ ಜಾವ್ನ್ ಜಿದ್ದಾನ್ ಫಾಪ್ಸುನ್ ಘಾಲೊ, ಭಶ್ಟ್ ಕರ್ನ್ ತುಜ್ಯಾ ತೆಲಾಯ್ಲಲ್ಯಾಕ್

ಪಾತ್ಕ್ಯಾಂಕ್ ಆರಾವ್ನ್ ಧರ್ಲ್ಯಾತ್ ಹಾಂವೆಂ, ದೆಕುನ್ ತುಂ ಸಯ್ತ್
ಪೆಟ್ಲಾಯ್ ಕ್ರೊಧಾನ್ ಪಾತ್ಕಾಂ ನಿತಿಕ್ ಹಾಂವ್ ಜಾಪ್ ದಿತಾಂ ಪಾತ್ಕ್ಯಾಂಕ್
ರಾಕ್ ಮ್ಹಣ್ ಹಾಂವ್ ಬೊಬ್ ಮಾರ್ತಾಂ, ಪುತಾಕ್ ಮಾರ್ಲಾಯ್,
ಚಾಕ್ರಾಂ ಮೊಗಾನ್, ಮೊವಾಳ್ ತರ್ ಚೊವ್ನ್ ಎಕ್ಲ್ಯಾನ್ ಸೊಸ್ಚೆಂ

ಹೆಣೆಂ, ಬಾಪಾ, ಸಾಂಡ್ಲಾಯ್ ತುವೆಂ, ತೆಣೆಂ ಮನ್ಶಾಕ್ ಇನ್ಕಾರ್ ಕೆಲಾ
ನಾಲಿಸ್ ಪಾತ್ಕಾಂ ಮುಕುಟ್ ದಾಮ್ತಾತ್, ಆಪ್ಲೆ ಘಾಣಿನ್ ಫುಮಾರ್ ಕರ್ತಾತ್
ಸಂಸಾರ್ ಆನಿ ಸರ್ಗ್ ಏಕ್ ಜಾಲಾ, ನಾಕಾ ಮ್ಹಣ್ಚ್ಯಾಂತ್ ಮಾಣಿಕ್ ಆಪ್ಲೆಂ

ಜಾಂವ್ದಿ ತರಿ, ನಿರ್ಮಿಲಲೆಂ, ಸಾಸ್ಣಾ ಥಾವುನ್, ಬಾಪಾ ತುವೆಂ ಏಕ್‍ಚ್
ಏಕ್ ಉಪ್ಕಾರ್ ಮಾಗ್ತಾಂ, ಜೆದ್ವಾಂ ತುಕಾ ಪ್ರಾಣ್ ಅರ್ಪಿತಾಮ ಭಾಗ್ ದಿ
ಉಚಾರ್ನ್ ಸಾಂಗ್ಚ್ಯಾಕ್ ಹಾಂವೆಂ, “ಪಾಳುಂಕ್ ದಿಲ್ಲೆಂ ಸಂಪದಲೆಂ.”