ಅಸುಂಪ್ಸಾಂವ್ ದೀಸ್, ನಿರ್ಮಳ್ ವೊರ್
ಆಂಜ್ ಭಡ್ವೆ ಗಾಯನ್ ಕರ್ತಿ, ನೋವ್‍ಯಿ ಕೊರ್

ಪಯ್ಲ್ಯಾ ಕೊರಾರ್ ಪಾವ್ಲಿ ಮರಿ, ಕುಪಾಂ ಉಗ್ತಿಂ ಜಾತಿ
ಸರ್ಗಿಂ ಥಾವ್ನ್ ಆಂಜ್ ದೆಂವ್ತಿಂ, ಕೆರೊಬಿಂ

ದುಸ್ರ್ಯಾ ಕೊರಾರ್ ಪಾವ್ಲಿ ಮರಿ, ಸುರ್ಯಾ ಪ್ರಾಸ್ ದಿಪ್ತಿ
ಆಂಜ್ ಭಡ್ವೆ ಗಾಯನ್ ಕರ್ತಿ, ವೈಕುಂಠಿಂ

ತಿಸ್ರ್ಯಾ ಕೊರಾರ್ ಪಾವ್ಲಿ ಮರಿ, ನೆಕೆತ್ರಾಂಚಿ ಮಾಳಾ
ಚಂದ್ರ ಫಾಂಕ್ಲಾ ಮರಿಯೆ ತುಜ್ಯಾ, ಪಾಂಯಾಂ ಥಳಾ

ಚೊವ್ತ್ಯಾ ಕೊರಾರ್ ಪಾವ್ಲಿ ಮರಿ, ಐಸಿ ರುಪೆವಂತಿ
ಕೆರೊಬಿಂ ಸೆರಾಫಿಂ ಆಂಜ್ ತಿಕಾ, ಲಬ್ದಲ್ಯಾತಿ

ಪಾಂಚ್ವ್ಯಾ ಕೊರಾರ್ ಪಾವ್ಲಿ ಮರಿ, ದೇವ್ ಪುತಾಚಿ ಮಾಯ್
ಆತಾಂ ಮಾಗಾ ಸಮೆಸ್ತ್ ಕ್ರಿಸ್ತಾಂವ್, ಕಿತೆಂ ಜಾಯ್

ಸವ್ಯಾ ಕೊರಾರ್ ಪಾವ್ಲಿ ಮರಿ, ದೇವ್ ಬಾಪಾಚಿ ದುಹಿತಾ
ಆನಂದ್ ಜಾಲಾ ಮರಿಯೆ ಪುತಾಕ್, ಸತೆವಂತಾ

ಸಾತ್ವ್ಯಾ ಕೊರಾರ್ ಪಾವ್ಲಿ ಮರಿ, ದೇವ್ ಬಾಪಾನ್ ದಿಲಾ ಹಾತ್
ಸರ್ಗಿಂ ಸುಂರ್ಗಾರಿಲಾ ಮಾಂತ್, ನೆಕೆತ್ರಾಂನಿ

ಆಟ್ವ್ಯಾ ಕೊರಾರ್ ಪಾವ್ಲಿ ಮರಿ, ದೇವ್ ಬಾಪಾನ್ ದಿಲಾಂ ಬೆಂಸ್
ದಿ-ಗೆ ಮಾಯೆ ಆಮ್ಕಾಂ ತೆಂಚ್, ಸರ್ಗಿಂಚೆಂ

ನೊವ್ಯಾ ಕೊರಾರ್ ಪಾವ್ಲಿ ಮರಿ, ದೇವ್ ಸ್ಪಿರಿತ್ ಸಾಂತಾಚಿ ಕಂತಾ
ತೊಚ್ ತಿಕಾ ರಾಣಿ ಮ್ಹಣ್, ಕುರ್ವಾರ್ ಕರ್ತಾ

ಹೆ ನೋವ್‍ಯಿ ಕೊರ್, ಗಾವ್ಯಾಂ ಆಮಿ ಹ್ಯಾ ವೆಳಾ
ಮಾಗ್ಯಾಂ ಆಧಾರ್ ದಿ ಮ್ಹಣ್ ಆಮ್ಚ್ಯಾ, ಮೊರ್ನಾ ಕಾಳಾ. ಆಮೆನ್