ಸುರ್ಯಾ ಪರಿಂ ತಿ ಪರ್ಜಳ್ತಾ
ಚಂದ್ರಾ ಪರಿಂ ಉಜ್ವಾಡ್ ಫಾಂಕ್ತಾ
ಸುಕ್ರಾ ಪರಿಂ ತಿ ಥಳ್ಥಳ್ತಾ
ಸೊಭಿತ್, ಸೊಭಿತ್, ಸುಂದರ್ ಮಾತಾ!

ಪ್ರಕಾಸ್ ಪಳೆವ್ನ್ ಉಲ್ಲಾಸ್ ಪಾವ್ತಾಂವ್
ಸೊಭಾಯ್ ದೆಕೂನ್ ಸಂತೊಸ್ ಭೊಗ್ತಾಂವ್
ಮಹಿಮಾ ಚಿಂತುನ್ ವಿಸ್ಮಿತ್ ಜಾತಾಂವ್
ಇಮ್ಮಾಕುಲಾಕ್ ಮ್ಹಣ್ ವರ್ಣಿತಾಂವ್!

ಸ್ವರ್ಣಾ ಪರಿಂ ತುಂ ಝಗ್ಜಗ್ತಾಯ್
ವಜ್ರಾ ಪರಿಂ ತುಂ ಉಜಳ್ತಾಯ್
ಘಡಿಯೆನ್ ಘಡಿಯೆ ತುಂ ಝಳ್ಜಳ್ತಾಯ್
ದಿಪ್ತೆನ್ ಸರ್ಗ್ ಸಗ್ಳೊ ಜಗ್ಲಯ್ತಾಯ್!

ಧೊಣ್ವಾ ಪ್ರಾಸ್ ತುಂ ಅಧಿಕ್ ರಂಗೀತ್
ಸುರ್ಪಾಯ್ ತುಜಿ ಕೊಣ್ ತೊ ವರ್ಣಿತ್?
ಬಾರಾ ನೆಕೆತ್ರಾಂ ಜಿಳ್ಮಿಳ್ತಿತ್
ಮೊತ್ಯಾಂ ಮುಕುಟ್ ತುಕಾ ಕರ್ತಿತ್!

ತುಕಾ, ಗರ್ಭಾ ಥಾವ್ನ್ ಪಯ್ಸ್ ಸರ್ಲೆಂ
ಸರ್ವ್ ಖತ್ ಸಂಯ್ಬಾಚ್ಯಾ ಪಾತ್ಕಾಚೆಂ
ತುಜ್ಯಾ ಆಂಕ್ವಾರ್ ಪಾಂಯಾನ್ ಚೆಂಚ್ಲೆಂ
ವಿಕಾಳ್ ಶೀಸ್ ಲುಸಿಫೆರಾಚೆಂ

ನಿತಳ್ ನಿರ್ಮಳ್ ಫುಲಾ ಪರಿಂ
ನಾ ಖತ್ ತುಜ್ಯಾ ಮಾಂತಾ ವೆರಿ
ಧವ್ಯಾ, ಧವ್ಯಾ ದೊವಾ ಪರಿಂ
ದುಲಬ್ ಆಮ್ಚಿ ಮಾತಾ ಮರಿ.

ಸುಕ್ರು ತುಂ ಫಾಂತ್ಯಾ ಪಾರಾಚೊ
ದಿಲೊಯ್ ಸುರ್ಯೊ ಸರ್ವ್ ನಿತಿಚೊ
ಜಾಣೆಂ, ಭಾಲೊ ಮಾರ್ನ್ ಕುರ್ಪೆಚೊ
ಕೆಲೊ ಪುರ್ತೊ ನಾಸ್ ಪಾಪಾಚೊ

ಬಾಪಾನ್ ತುಕಾ ಧುವ್ ಮ್ಹಣ್ ಘೆತ್ಲ್ಯಾ
ಪುತಾನ್ ಮಾಯ್ ಮ್ಹಣ್ ವಿಂಚುನ್ ಕಾಡ್ಲ್ಯಾ
ಪವಿತ್ರ್ ಅತ್ಮ್ಯಾನ್ ಕಂತಾ ಕೆಲ್ಯಾ
ಕರ್ಪೆನ್ ಸಗ್ಳಿಚ್ ಸುಂರ್ಗಾರಿಲ್ಯಾ!

ದೆಕುನ್, ಮಾಯೆ, ತುಜ್ಯಾ ಭುಗ್ರ್ಯಾಂಕ್
ಲಿಪಯ್ ಮಾಂತಾ ಭಿತರ್ ಸಕ್ಟಾಂಕ್
ವೈರಿಂಕ್ ಆಮ್ಚ್ಯಾ ನಾಕಾ ಸೊಡುಂಕ್
ಕೆದಿಂಚ್ ಥಂಯ್ಚಿ ವೊಡ್ನ್ ಭಾಯ್ರ್ ಕಾಡುಂಕ್

ಅನಂದ್ ಬಾಪಾಕ್, ಅನಂದ್ ಪುತಾಕ್
ಅನಂದ್ ತುಕಾ ಪವಿತ್ರ್ ಅತ್ಮ್ಯಾಕ್
ತೇಗ್‍ಯಿ ಜಣಾಂಕ್, ಎಕಾ ದೆವಾಕ್
ವರ್ತೊ ಅನಂದ್ ಸಾಸ್ಣಾ ಸಾಸ್ಣಾಕ್.