ದುಖೆಸ್ತಿ ಮಾಯೆ, ಮರಿಯೆ ವಿಚಿತ್ರ್ ತುಜೆ ಭೊಗ್ಣಾರ್
ಜೆಜು ಮೊರ್ಚೆ ತೆ ಘಡಿಯೆ, ಕಾಲ್ವಾರಿಚ್ಯಾ ಗುಡ್ಯಾರ್

ದುಖೆಸ್ತಿ ದುಲಬ್ ಮರಿಯೆ, ತುಜಿ ಭಿರ್ಮತ್ ಪಾವ್ತಾಂವ್
ಪಾತ್ಕಿ ಭುರ್ಗಿಂ ಏ ಮಾಯೆ, ತುಜಿ ದಯಾ ಮಾಗ್ತಾಂವ್

ತುಜೆಂ ಕಾಳಿಜ್ ವಿದಾರ್ಲೆಂ, ಜೆಜು ಮೊರ್ಚೊ ಪಳೆವ್ನ್
ಅಕ್ಮಾನಾ ಘಾಯಾ ಸವೆಂ, ಅಧಿಕ್ ಕಶ್ಟೊನ್ ಕಳ್ವಳ್ನ್

ಕುಡಿ ವಯ್ಲ್ಯಾನ್ ರಗ್ತ್ ವ್ಹಾಳ್ತಾ, ಅತ್ಮೊ ಭರ್ಲಾ ಖಂತಿನ್
ಪುತಾಚೆ ಕಷ್ಟ್ ಮಾಯ್ ದೆಕ್ತಾ, ಖುರ್ಸಾಮುಳಿಂ ಕಠಿಣ್

ಮಾರ್ತಿರಾಂಚೆ ರಾಣಿಯೆ, ಸಗ್ಳಿಚ್ ತುಂ ದುಖೆಸ್ತಿಣ್
ಜೆಜು ಲಾಗಿಂ ಜಾ ಮಾಯೆ, ಆಮ್ಚಿ ವ್ಹಡ್ ಶಾರತಿಣ್