ಖುರ್ಸಾ ಮುಳಿಂ ದುಖಿ ಮಾತಾ, ಖಂತಿಶ್ಟ್ ಚಿಂತೆಸ್ತ್ ಉಬಿ ರಾವ್ತಾ
ಪೂತ್ ಖುರ್ಸಾರ್ ಉಮ್ಕಳ್ತಾ

ಆಸ್ಕಾರ್ ಉಸ್ಕಾರ್ ತಿ ಚಡ್ ಸೊಡ್ತಾ, ಖಂತಿನ್ ಬುಡೊನ್ ರುದಾನ್
ಕರ್ತಾ ಭಾಲಿ ಕಾಳಿಜ್ ಫಾಪ್ಸಿತಾ

ಹಾ! ಕಿತ್ಲಿ ಖಂತ್ ಮರಿ ಭೊಗ್ತಾ, ಹಾ! ಕಿತ್ಲಿ ದೂಖ್ ಮಾತಾ ಸೊಸ್ತಾ
ಎಕ್ಲ್ಯಾಚ್ ಪುತಾ ಸಾಂಗಾತಾ

ತಾರಕ್ ಖುರ್ಸಾರ್ ಬೋವ್ ವಳ್ವಳ್ತಾ, ಮಾತಾ ಪಳೆವ್ನ್‍ಚ್ ಕಳ್ವಳ್ತಾ
ಅಘೋರ್ ವೊಡಿ ಪುತಾಚ್ಯೊ

ನಿಶ್ಟುರ್ ಮನಿಸ್ ಕೊಣ್ ರಡ್ತೊನಾ, ದುಖೆಸ್ತ್ ಮಾಯೆಕ್ ಪಳೆತಾನಾ
ಇತ್ಲೆ ಥೊರ್ ಕಶ್ಟ್ ಭೊಗ್ತಾನಾ?

ಕೊಣ್ ತೊ ಮನಿಸ್ ದುಖಾಂ ತಡ್ವಿತ್, ಮರಿಯೆ ಮಾಯೆಕ್ ಜರ್
ನಿಯಾಳಿತ್, ಪುತಾ ಸಂಗಿಂ ದುಖೆಸ್ತಿಕ್

ಪಾತಕ್ ಜೆಜುಕ್ ವಳ್ವಳಾಯ್ತಾ, ಪಾತಕ್ ಮ್ಹಜೆಂ ಜೆರ್ಬಾಂದ್ ಮಾರ್ತಾ
ಮಾತಾ ಹೆಂ ಸರ್ವ್ ಪಳೆತಾ

ದುಲಬ್ ಆಪ್ಲ್ಯಾ ಪುತಾಕ್ ದೆಕ್ಲೊ, ಭುಜೊವ್ಣೆವಿಣ್ ಉಮ್ಕಳ್ತಾಲೊ
ಆಕೇರ್ ಉಸ್ವಾಸ್ ಸೊಡಿಸರ್

ಮರಿಯೆ ಮಾಯೆ, ಮೊಗಾ ಝರಿ, ರಡುಂಕ್ ಹಾಂವೆಂ ತುಜೆ ಸರಿ
ದೂಖ್ ಮ್ಹಾ ನಿಬೊರ್ ಮ್ಹಾಕಾ ದಿ

ಪೆಟಯ್ ಮಾಯೆ ಜಳ್ತ್ಯಾ ಉಜ್ಯಾನ್, ಕಾಳಿಜ್ ತಾರಕಾಚ್ಯಾ, ಮೊಗಾನ್
ಹಾಂವೆಂ ತಾಕಾ ಮಾನ್ವೊಂಚ್ಯಾಂಕ್

ಸದೆಂವ್ ಮರಿಯೆ ಮಾಗ್ತಾಂ ಉಪ್ಕಾರ್, ಖಂಚಯ್ ಘಾಯ್ ಮ್ಹಜ್ಯಾ
ಕಾಳ್ಜಾರ್, ಖುರ್ಸಾರ್ ಮೆಲ್ಲ್ಯಾ ಜೆಜುಚೆ

ತುಜ್ಯಾ ಪುತಾ ಘಾಯೆಲ್ಲ್ಯಾಚೆ, ಮೊಗಾನ್ ಮ್ಹಜ್ಯಾ ಕಶ್ಟಲ್ಲ್ಯಾಚೆ
ಕಶ್ಟ್ ದಗ್ಧ್ ಮ್ಹಾಕಾ ವಾಂಟುನ್ ದಿ.

ತುಜೆ ಸವೆಂ ಹಾಂವೆಂ ರಡುಂಕ್, ಜೆಜುಕ್ ನಿಯಾಳ್ನ್ ಬಿರ್ಮತ್ ಪಾವುಂಕ್
ಕುಪಾ ಲಾಭಯ್ ಮೊರಾಸರ್

ಖುರ್ಸಾ ಮುಳಿಂ ಉಬೊ ರಾವುಂಕ್, ದುಖಾಂತ್ ತುಜೊ ಸಾಂಗಾತ್
ಕರುಂಕ್, ಖುಶಿ ವ್ಹರ್ತಾಂ, ಅತ್ರೆಗ್ತಾಂ.

ಹಿ ಕೂಡ್ ಜಾತಚ್ ಮೊರ್ನಾ ಸ್ವಾಧೀನ್, ಅತ್ಮೊ ವ್ಹರ್ನ್ ತುಜೆ ಅಧೀನ್
ಜೊಡ್ನ್ ದಿ ತಾಕಾ ಸಾಸ್ಣಿಕ್ ಸುಖ್

ಸದೆಂವ್ ಆಂಕ್ವಾರಿಂಚ್ಯಾ’ಕ್ವಾರಿ, ಮಾಗ್ಣ್ಯಾಂತ್ ಮ್ಹಜ್ಯಾ ಜಾ ಉದಾರಿ
ರಡುಂಕ್ ತುಜೆ ಸಾಂಗಾತಾ

ಪುತಾಚೆಂ ಮೊರ್ನ್ ವಾವೊಂವ್ಕ್ ಶಿಕಯ್, ಕಶ್ಟಾಂತ್ ತಾಚೆ ಸಂಗಿಂ
ಚಲಯ್, ತಾಚೆ ಘಾಯ್ ನಿಯಾಳುಂಕ್

ತಾಚೆ ಘಾಯ್, ಮ್ಹಜೆರ್ ಖಂಚಯ್, ತಾಚೆಂ ರಗತ್ ಮ್ಹಾಕಾ ಪಿವಯ್
ಮ್ಹಾಕಾಚ್ ಹಾಂವೆಂ ವಿಸ್ರಸರ್

ಝಡ್ತೆ ದಿಸಾ ರಾಕ್-ಗೆ ಮ್ಹಾಕಾ, ಉಜ್ಯಾಂತ್ ಪಡೊಂಕ್ ಸೊಡಿನಾಕಾ
ಪಾವಯ್ ಸುಖಾಕ್ ಸರ್ಗಿಂಚ್ಯಾ

ಕ್ರಿಸ್ತಾ ಪಾವ್ತಚ್ ವೇಳ್ ಮೊರ್ನಾಚೊ, ಮುಕುಟ್ ಮ್ಹಾಕಾ ದಿ ಜಯ್ತಾಚೊ
ಮಾಗ್ಣ್ಯಾ ವರ್ವಿಂ ಮಾಯೆಚ್ಯಾ