1. ಸರ್ಗಿಂ ಥಾವುನ್, ಜೆಜು ಸಂಸಾರಿ ಆಯ್ಲೊ
ನೀಜ್ ದೇವ್ ಆಸ್ತಾಂ ನೀಜ್, ಮನಿಸ್ ಜಾಲೊ

2. ಆಸ್ತಾಂ ದೇವ್ ಸರ್ಗಿಂಚೊ, ರಚ್ನಾರ್ ಆಂಜಾಂ ಭಡ್ವ್ಯಾಂಚೊ
ಸಂಸಾರಿಂ ಯೆವ್ನ್ ಘೆತ್ಲೊ ರುಪ್ಕಾರ್, ಪಾತ್ಕಿ ಮನ್ಶಾಂಚೊ

3. ತೆತ್ತಿಸ್ ವರ್ಸಾಂ ಪರ್ಯಾಂತ್, ಜಿಯೆಲೊ ಹ್ಯಾ ಸಂಸಾರಾಂತ್
ಸರ್ಗಿಂಚೆಂ ರಾಜ್ವಟ್ ಪರ್ಗಟುಂಕ್, ಮನ್ಶಾಕುಳಾಕ್

4. ಶೆಕಿಂ ಪಾವ್ತಚ್ ವೇಳ್ ತಾಚೊ, ಆಪ್ಲ್ಯಾ ಬಾಪಾ ಲಾಗಿಂ ವೆಚೊ
ಮೋಗ್ ಕೆಲೊ ಮನ್ಶಾಂಚೊ, ಶೆವಟ್ ಪರ್ಯಾಂತ್ ತಾಂಚೊ

5. ನಿಮಾಣೆ ತೆ ರಾತ್ರಿ, ಬ್ರೆಸ್ತಾರಾಚೆ ಪವಿತ್ರಿ
ಆಪ್ಲ್ಯಾ ಶಿಸಾಂಕ್ ಘೆವ್ನ್ ಬಸ್ಲೊ, ಮೆಜಾರ್ ಮೆಸ್ತ್ರಿ

6. ಮೆಜಾರ್ ಘಾಲೆಂ ಜೆವಣ್, ಆನಿ ಕೆಲಿ ಪಾಸ್ಕಾಚಿ ಪರ್ವಣ್
ಕರ್ಚ್ಯಾ ಫುಡೆಂ ಆಪ್ಣೆಂಚ್, ಮನ್ಶಾಂಚಿ ಸೊಡ್ವಣ್

7. ಮೆಜಾರ್ ಆಸ್ತಾಂ ಮ್ಹಣ್ತಾಲೊ, ಆಪ್ಲ್ಯಾ ಶಿಸಾಂ ಲಾಗಿಂ ಉಲಯ್ತಾಲೊ
ಆಜ್ ತುಮ್ಚೆ ಭಿತರ್ ಎಕ್ಲೊ, ಮ್ಹಾಕಾ ವಿಕ್ತಲೊ

8. ದಿಸಿಪ್ಲ್ ಸಗ್ಳೆ ಕಾಂಪ್ಲೆ, ಎಕಾಮೆಕಾ ಚೊಂವ್ಕ್ ಲಾಗ್ಲೆ
ಕಾಂಯಿ ಆಮಿ ಜಾಂವ್ಗಿ ಮ್ಹಣುನ್, ಮೆಸ್ತ್ರಿ ಕಡೆ ವಿಚಾರಿತಾಲೆ

9. ಜೊ ಮ್ಹಜ್ಯಾ ಮೆಜಾರ್ ಜೆವಿತಾ, ಮ್ಹಜೆ ಸವೆಂ ಪೊಸ್ಣ್ಯಾಂತ್ ಹಾತ್ ಘಾಲಿತಾ
ತೊಚ್ ತಾಚ್ಯಾ ಮನಾಂತ್ ಮ್ಹಾಕಾ, ವಿಕುಂಕ್ ಚಿಂತಿತಾ

10. ಮೆಜಾ ವಯ್ಲೊ ಉಠಲೊ, ಪೆಂಕ್ಟಾಕ್ ಬಾಂಧ್ಲೊ ಏಕ್ ತುವಾಲೊ
ತಸ್ತಾಂತ್ ಉದಕ್ ಘೆವ್ನ್ ದಿಸಿಪ್ಲಾಂಚೆ, ಪಾಂಯ್ ಧುಂವ್ಕ್ ಲಾಗಲೊ

11. ಧುತಾಂ ಧುತಾಂ ಪಾವ್ಲೊ, ಶಿಸಾ ಪೆದ್ರು ಲಾಗಿಂ ಆಯ್ಲೊ
ಪೆದ್ರು ಆಪ್ಲೆ ಪಾಂಯಿ ಪಾಟಿಂ, ಕಾಡುಂಕ್ ಲಾಗ್ಲೊ

12. ಏ ಮ್ಹಜ್ಯಾ ಮೆಸ್ತ್ರಿ! ತುಂ ಸರ್ಗಾ ವಯ್ಲೊ ಶಾಸ್ತ್ರಿ
ಕಸಲಿ ಕರ್ನಿ ಕರ್ತಾಯ್ ಸಾಯ್ಬಾ, ಭೋವ್ ವಿಚಿತ್ರಿ

13. ರಾಯಾಂಚೊ ತುಂ ರಾಯ್, ಸರ್ಗಿಂಚೊ ದೇವ್ ಬಾಪ್ ತುಜೊ ಪಾಯ್
ಹಾಂವ್ ಧುಂವ್ಕ್ ಸೊಡಿನಾಂ ತುಕಾ, ಮ್ಹಜೆ ನಶ್ಟ್ಯಾಚೆ ಪಾಂಯ್

14. ತೆವಾಂ ಜೆಜು ಮ್ಹಣೆಂ ಪೆದ್ರುಶಿಂ, ಜರ್ ತುಂ ಪಾಂಯ್ ಧುಂವ್ಕ್ ಸೊಡಿನಾ ಜಾಶಿ
ಮ್ಹಾಕಾ ಆನಿ ತುಕಾ ಆಜ್, ವೆಗ್ಳಾಚಾರ್ ಜಾತಾಶಿ

15. ಏ ಮ್ಹಜ್ಯಾ ಶೆಣಯ್, ತುಂ ಕರ್ತಾಯ್ ತೆಂ ತೂಂಚ್ ಜಾಣಾಯ್
ನ್ಹಯಿಂಚ್ ಮ್ಹಜೆ ಪಾಂಯಿ ಬಗರ್, ಮ್ಹಾಕಾ ಸಗ್ಳೊಚ್ ನ್ಹಾಣಯ್

16. ಹಾಂವ್ ತುಮ್ಚೊ ಮೆಸ್ತ್ರಿ ಆಸ್ತಾಂ, ಜರ್ ತುಮ್ಚೆ ಪಾಂಯ್ ಧುತಾಂ
ನವೆ ಸಮಡ್ತಿಚೊ ನವೊ, ಮಂದಮೆಂತ್ ದಿತಾಂ

17. ಜಸೊ ತುಮ್ಚೊ ಮೋಗ್ ಕೆಲೊ, ತಸೊಚ್ ತುಮಿ ಎಕಾಮೆಕಾ ಕರಾ
ಸಂಸಾರ್ ಸರಾ ಪರ್ಯಾಂತ್ ತುಮಿ, ಮೊಗಾನ್ ಚಲಾ

18. ಪರ್ತುನ್ ಬಸ್ಲೊ ಮೆಜಾರ್, ಆನಿ ದಿಷ್ಟ್ ಲಾವ್ನ್ ಸರ್ಗಾರ್
ಆಪ್ಣಕ್‍ಚ್ ದವ್ರುಂಕ್ ಚಿಂತುಂಕ್ ಲಾಗ್ಲೊ, ಹ್ಯಾ ಸಂಸಾರಾರ್

19. ಹಾತಾಂತ್ ಘೆವ್ನ್ ಉಂಡೊ ಗೊಂವಾಚೊ, ಕಾಲ್ಸಿಂತ್ ರೋಸ್ ದ್ರಾಕ್ಶಾಫಳಾಂಚೊ
ಕೊನ್ಸೆಕ್ರಾರ್ ಕರ್ನ್ ಘಡ್ಲೊ, ಸಾಕ್ರಾಮೆಂತ್ ಮೊಗಾಚೊ

20. ಉಂಡೊ ಮೊಡಿಲೊ, ಬಾರಾಯ್ ಜಣಾಂಕ್ ವಾಂಟಿಲೊ
ಆಸೊ ಬೊರ್ಯಾಂಕ್ ದಿಲೊ ತಸೊಚ್, ಖೊಟ್ಯಾಕಿ ದಿಲೊ

21. ಉಂಡೊ ಮ್ಹಜೆಂ ಮಾಸ್, ದಾಕಾಂಚೊ ರೋಸ್ ಮ್ಹಜೆಂ ರಗತ್
ಜೊ ಕೋಣ್ ಹೆಂ ಸೆವಿತ್, ತೊ ಸಾಸ್ಣಾಕ್ ಜಿಯೆತ್

22. ಜೊ ಕೊಣ್ ಮ್ಹಾಕಾ ಸೆವಿತಾ, ತೊ ಮ್ಹಜೆ ಥಂಯಿ ರಾವ್ತಾ
ಹಾಂವ್ ತಾಚೆ ಥಂಯ್ ಮೆಳೊನ್, ದೊಗ್‍ಯಿ ಏಕ್‍ಚ್ ಜಾತಾಂವ್

23. ಏ ಜೆಜು ಮೊಗಾಳಾ, ಏ ಜೆಜೂ ಆಮ್ಚ್ಯಾ ದಯಾಳಾ
ಪಾವ್ ತುಂ ಆಮ್ಕಾಂ ಆತಾಂ ಆನಿ, ತುಕಾ ಘೆಂವ್ಚ್ಯಾ ವೆಳಾ

24. ಪಾತ್ಕಾಂಚಿ ದೂಖ್ ವ್ಹಡ್ ಧರ್ತಾಂವ್, ಖರೊ ನಿಚೆವ್ ಆಮಿ ಕರ್ತಾಂವ್
ಆಮ್ಚ್ಯಾ ನಿಚೆವಾರ್ ಘಾಲ್ ಸಾಯ್ಬಾ, ತುಜೆಂ ಕುರ್ಪೆಚೆಂ ಬೆಸಾಂವ್