ಉಠಾ ಉಠಾ ಪ್ರಾಣಿಯಾ, ಸಾಂಡಾ ಸಾಂಡಾ ಸಂಸಾರ್ ಮಾಯಾ
ಪಾಟ್ ಕರೊನಿ ತೆಯಾ, ಒಳ್ಖಾ ಜೆಜು ರಾಯಾ

ಅಥಿರ್ ಸಂಸಾರ್, ಅಥಿರ್ ತಾಚೊ ಆಧಾರ್
ಅಥಿರ್ ಹಂಕಾರ್, ಅಥಿರ್ ತಾಚೊ ದಳ್ಭಾರ್

ತಾಚೆರ್ ಪಾತ್ಯೆವ್ನ್ ರಾವ್ಲಲೆ, ಪ್ರಾಚಿತ್ ಕರುಂಕ್ ನಾ ಪಾವ್ಲೆ
ನಿದ್ರೆಸ್ತ್ ಜಾವ್ನ್ ಉರಲೆ, ಜಾಗ್ರುತ್ ಜಾಯ್ನಾಸ್ತಾಂ ಸರಲೆ

ಜೆ ಕೊಣ್ ತಾಕಾ ಭುಲಲೆ, ನಾನಾ ಪರಿಂ ಫಟ್ವಾಲೆ
ಇಶ್ಟ್ ಇಶ್ಟ್ ಮ್ಹಣುನ್ ಚಲಲೆ, ಶೆಕಿಂ ಗುಲಾಮ್ ಜಾಂವ್ಕ್ ಪಾವ್ಲೆ

ದೊತೊರ್ನ್ ಶಿಕೊಂಕ್ ಪೊಳ್ತಾಲೆ, ಖಂಯ್ ಆತಾಂ ತೆ ಪಾವ್ಲೆ?
ಫಾಲ್ಯಾ ಶಿಂಕೊವ್ ಮ್ಹಣ್ತಾಲೆ, ಪಾಳ್ಯಾ ಜಾಯ್ನಾಸ್ತಾನಾ ಸರಲೆ

ಸಯ್ರೆ ದಯ್ರೆ ಸರಲೆ, ಇಶ್ಟ್ ಮಂತ್ರ್ ಪಯ್ಲೆ ಅಂತರ್ಲೆ
ಹೆಂ ಮನಿಂ ಚಿಂತುನ್ ಆಪಾಪಲೆ, ಹಾಕ್ ಮಾರ್ಯಾಂ ಜೆಜು ಕಡೆ

ಥರ್ಥರ್ಯಾಂ ಕಾಂಪೊನಿ, ಮ್ಹಣ್ತಾಂವ್ ಮನಿಂ ವಿಳಾಪ್ ಕರೊನಿ
ಹಾ ಕಟಾ! ಕಟಾ! ಸೊಮ್ಯಾ ಆಮ್ಚಿ ಜಿಣಿ, ಇತ್ಲ್ಯಾನ್ ಜಾಲ್ಯಾಂವ್ ನಿರ್ಗುಣಿ

ಹೆ ಪುಣಿ ಸಬ್ದ್ ಆಯ್ಕೊನಿ, ಕಾಕುಳ್ತ್ ಆಮ್ಚೆರ್ ಠೆವುನಿ
ಆಠೊವ್ ಕರ್ ಸೊಮ್ಯಾ ಆಮ್ಚೊ ಮ್ಹಣೊನಿ
ಅಪ್ರಾಧ್ ಮಾಗ್ತಾಂವ್ ಭೊಗ್ಸುನಿ. ಆಮೆನ್