1. ಉಂಡ್ಯಾ ರುಪಾರ್ ಯೆವುನ್, ತುಕಾಚ್ ಮೊಡುನ್ ವಾಂಟ್ಲಾಯ್
ಪೋಶಣ್ ಆಮ್ಚೆಂ ಜಾವುನ್, ಭುಕ್ ಆಮ್ಚಿ ಥಾಂಬಯ್ತಾಯ್
ದೆಣಿಂ ತುಜಿಂ ದಿವುನ್, ಸಂತುಶ್ಟ್ ಆಮ್ಕಾಂ ಕರ್ತಾಯ್
ಕಾಳ್ಜಾಂತ್ ಆಮ್ಚ್ಯಾ ರಾವುನ್, ಆನಂದ್ ಆಮ್ಕಾಂ ದಿತಾಯ್

ವರ್ತೊ ಸಂತೊಸ್ ಭೊಗ್ತಾ ಆಮ್ಕಾಂ
ಸ್ವಾಗತ್ ಕರ್ಚ್ಯಾಕ್ ತುಕಾ
ರಾವ್ ತುಂ, ಸೊಮ್ಯಾ, ಆಮ್ಚೆ ಸಂಗಿಂ
ಆತಾಂ ಆನಿ ಸದಾಂ

2. ಮೊಗಾನ್ ಆಮ್ಚ್ಯಾ ಭರೊನ್, ಬಾಪಾ ಥಾವ್ನ್ ತುಂ ಆಯ್ಲಾಯ್
ಆಮ್ಚೆ ಮಧೆಂ ರಾವುನ್, ಸೊಮಿ ಆಮ್ಚೊ ಜಾಲಾಯ್
ಖುರ್ಸಾರ್ ತುಕಾಚ್ ಭೆಟೊವ್ನ್, ಸೊಡ್ವಣ್ ಆಮ್ಚಿ ಕೆಲ್ಯಾಯ್
ಪುನರ್‍ಜಿವಂತ್ ಜಾವುನ್ ಜಿವಿತ್ ಜೊಡುನ್ ದಿಲಾಂಯ್

3. ದಯಾ ತುಜಿ ದಾಕೊವ್ನ್, ಶಾಂತಿ ತುಜಿ ಲಾಭಯ್
ಶೆಗುಣಾಂನಿ ನೆಟವ್ನ್, ಮೊಗಾನ್ ಆಮ್ಕಾಂ ಪೆಟಯ್
ಉಜ್ವಾಡ್ ತುಜೊ ಫಾಂಕೊಂವ್ನ್, ಸತಾ ವಾಟೆನ್ ಚಲಯ್
ಕುರ್ಪಾ ತುಜಿ ದಿವುನ್ ಭಾವಾರ್ಥ್ ಆಮ್ಚೊ ಜಳಯ್

4. ಆಧಾರ್ ತುಜೊ ಘೆವುನ್, ಶಿಕೊವ್ನ್ ತುಜಿ ಪಾಳ್ತಾಂವ್
ಸೆವಾ ತುಜಿ ಕರುನ್, ಖುಶಿ ತುಜಿ ಮಾಂದ್ತಾಂವ್
ಅರ್ಗಾಂ ತುಕಾ ದಿವುನ್ ವ್ಹಡ್ವಿಕ್ ತುಜಿ ಗಾಯ್ತಾಂವ್
ದೈವಿಕ್ ಮೊಗಾನ್ ಭರೊನ್, ತುಜೆ ಥಂಯ್ ಜಿಯೆತಾಂವ್